2013 жылдың 9 айында Қазақстанда 4,6 млн шаршы метр тұрғын үй салынды – Өңірлік даму министрлігі
9 айдың қорытындысы бойынша 4,6 млн шаршы метр тұрғын үй салынды, деп хабарлады Өңірлік даму министрінің бірінші орынбасары Қайырбек Өскенбаев ҚР Үкіметі отырысында.
«Қолжетімді тұрғын үй - 2020» бағдарламасын іске асыру қорытындыларын шығара келе, құрылыс қарқынының өсуін атап өту қажет. 9 айдың қорытындысы бойынша 4,6 млн шаршы метр тұрғын үй салынды», - деді Қ.Өскенбаев.
Бірінші вице-министрдің айтуынша, жинақталған қарқын осы жылы өткен жылғыдан артық салуға және 6,8 млн шаршы метр тұрғын үйді пайдалануға беруді қамтамасыз етуге мүмкіндік береді.
«Тұрғын үйді пайдалануға берудің жалпы көлемінде 59 %-дан астамы немесе 2,7 млн шаршы метр жеке тұрғын үй құрылысының үлесіне тиесілі. Бұл өткен жылдың ұқсас кезеңі ішінде салынған көрсеткіштен 12 %-ға артық», - деп толықтырды ол.
Жалпы алғанда, мемлекеттік меншіктегі кәсіпорындармен және ұйымдармен 9 айдың ішінде 524,9 мың шаршы метр тұрғын үй пайдалануға берілді.
Қазақстанның Премьер-министрі мен Үкіметі жаңалықтарынан хабардар болыңыз — ресми Telegram-каналға жазылыңыз
